Weekly Nepal

“मधेशीलाई मूलधारमा नल्याउदा विखण्डन हुन्छ”

काठमाडौं, कात्तिक ४ ।  प्रधानमन्त्री डा. बाबुराम भट्टराईले विवादमा तानिएका रक्षामन्त्री शरतसिंह भण्डारी र भूमिसुधार मन्त्री प्रभु साहलाई बुधबार वर्खास्त गरेका छन्। रक्षा मन्त्री भण्डारीले मधेशका वास्तविकता वताउँदै राष्ट्रिय अखण्डताका पक्षमा पूर्व सचेत गराउने वाक्यांशका साथ असोज ९ गते राजधानी मा आयोजित एक कार्यक्रम मा “मधेशीले अधिकार पाएन वा विभेद भै रहयो भने मधेशी समुदाय भित्र राष्ट्रिय एकता र अखण्डताका गाँठो कमजोर बन्न सक्छ” जस्ता अभिव्यक्ति दिएका थिए। कार्यक्रममा बोल्दै भण्डारीले साझा र समावेशी नेपालले तराईका २२ जिल्ला नेपालबाट अलग हुन सक्ला त्यसैले समयमै सम्बोधन गर्न सकिएन भने हाम्रो नेपालको अखण्डतामै समस्या पर्न सक्ला भनि अभिव्यक्ति दिएका थिए। 
राष्ट्रिय अखण्डता र राष्ट्रिय जर्गेना हुने गरी सचेत गराएका भण्डारीका वाक्याश्ंालाई “तराईका २२ जिल्ला नेपालबाट अलग हुन सक्ने” भनी विवादस्पद र राष्ट्रविरोधी अभिव्यक्ति दिएको आरोप लगाउँदै विरोध गरिएको थियो। वर्तमान सरकार र चार बुँदे सम्झौताका विरोधीहरूले सरकारका विरोध गर्ने दाउ खोजिरहेकाबेला भण्डारीका अभिव्यक्तिलाई बङग्याएर सडक तताउन थालेका थिए। कुरा र भाव नै नबुझी साम्प्रदायिक पत्रकार, बुद्धिजिवी र अर्ध–राष्ट्रवादी सोचका नेताहरूले सरकार खसाउन विरोधलाई तिव्रता दिँदै संसद समेत अवरूद्ध गरिरहे। रक्षा मन्त्रीको अभिव्यक्ति राष्ट्रद्रोही रहेको संज्ञा दिदै काँग्रेस, एमाले र माओवादीका एक घटकले रक्षा मन्त्रीले राजीनामा नदिए संसद चल्नै नदिने अडानमा गए। भण्डारीले आफु राष्ट्रिय अखण्डता र समानताका पक्षमा अभिव्यक्ति दिएको भन्दै कुनै शर्तमा राजीनामा नदिने प्रष्ट पारे। 
मधेशको पक्षमा बोल्दा पनि मधेशी मोर्चाले खुट्टा कमाएपछि फोरम लोकतान्त्रिकले पार्टी भित्र राजनैतिक समितिको बैठक बोलाई रक्षा मन्त्रीलाई फिर्ता बोलाए। पार्टीले फिर्ता बोलाउन निर्णय गरेपछि प्रधानमन्त्रीले बुधबार पदमुक्त गरेका हुन्। रक्षा मन्त्रीलाई फिर्ता बोलाउने र नबोलाउने विषयमा तीन दिन तनाव पूर्ण छलफल भएपछि पार्टीले बुधबार निर्णय लिएका थिए। उक्त निर्णय प्रति भण्डारी सहित १० सभासद् असहमति जनाउदै बैठक बहिस्कार गरेका थिए। 
सभासद्हरूमा प्रमोद गुप्ता, निलम वर्मा, करिमा वेगम, सेवकि दास, कलावति पासवान, ओमप्रकाश यादव,कौशल किशोर यादव, मृगेन्द्र सिंह, वकील मुसलमान, रामबच्चन अहिर, लक्ष्मण महतो, शत्रुधनसिंह कोइरी, संजय कुमार साह, आशा कुमारी सरदार, रमानन्द मण्डल लगायतका सभासद्हरू शरदसिंहका पक्षमा हालसम्म रहेका छन्। पार्टीभित्र मधेशप्रति प्रष्ट हुने अथवा सरकारी लोकतान्त्रिकको आवरण धारण गर्ने? लगायतका प्रश्नहरू उब्जिन थालेका छन्। कांग्रेस र एमालेले शान्ति र संविधान नचाहेको भन्दै निवर्तमान रक्षामन्त्री भण्डारीले विभिन्न बहाना मुलुकलाई बन्धक बनाउन खोजेको आरोप लगाउनुभयो। उनले भने, 'आफूले समावेशीकरणको आवाज उठाएको हो र यस पक्षमा बोलिरहने छु, म कांग्रेस एमालेलाई चुनौती दिन्छु मलाई राज्यद्रोहको मुद्दा लगाई साबित गरोस्।' मधेश मिडिया हाउसमा बुधबार आयोजित कार्यक्रममा भण्डारीले आफूलाई अन्यायपूर्ण ढंगले हटाएको र संसदमा आफ्ना राख्न समेत नदिएको बताउनु भएको छ। अभिव्यक्तिलाई बङ्ग्याएर संसद अवरूद्ध गरी शान्ति र संविधान निर्माणको कार्य थप्प गरेका कांग्रेस एमाले लगायतका पार्टीहरूले भण्डारीकै आडमा सरकारविरूद्ध मोर्चा थालेका कारण फोरम लोकतान्त्रिकले राजनीतिक निकास दिनका लागि रक्षामन्त्रीलाई फिर्ता बोलाउने निर्णय गरेको कुरा पार्टी स्रोतले जनाएको छ। रक्षामन्त्रीको अडान र भावना राष्ट्रवादी रहे तापनि राजनीतिक अवरोध र अपजसबाट जोगिन फोरम लोकतान्त्रिकले रक्षामन्त्री भण्डारीलाई फिर्ता बोलाएको हो। भण्डारीका अभिव्यक्ति राष्ट्रिय अखण्डताको पक्षमा रहेको र राष्ट्रद्रोही नरहेको कुरा माओवादीले एक प्रेस विज्ञप्तिमार्फत सार्वजनिक गरिसकेको छ।