Weekly Nepal

अन्ना क्यासिनोमा कमरेडद्वारा अन्याय

काठमाडौ, साउन ३० । तपाईं पनि छोटो समयमै करोडपति बन्न चाहनुहुन्छ? यदि चाहनुहुन्छ भने मोडलिङका रुपमा माओवादी मजदुर युनियनका केही समयअघिसम्मका अन्ना क्यासिनोका अध्यक्ष कल्पदीप राई र सोही क्यासिनोमा कार्यरत कर्मचारी तप्तबहादुर विष्टलाई लिन सक्नुहुन्छ। काठमाडौंमा भौंतारिएका कल्पदीप राई २०५४ सालमा अन्ना क्यासिनोमा जुनियर क्यासियरका रुपमा काम गर्न थाले। शुरुमा कुनै पनि युनियनमा नलागेका भएपनि पछि उनी माओवादी मजदुरनिकट भई काम गर्न थालेका थिए।

माओवादी मजदुर युनियनमा संगठित भई काम गर्ने क्रममा उनले कार्यक्रमका नाममा लाखौं रकम दरबारमार्ग क्षेत्रबाट उठाउने र कहिल्यै पनि हिसाबकिताब नदेखाउने गरेको उनका सहकर्मीहरु बताउँछन्। यो क्रम बढ्दै जाँदा र तत्कालीन अखिल नेपाल ट्रेड युनियन महासंघका अध्यक्ष शालिकराम जम्कट्टेलको सहयोगी बन्न सफल भए। माओवादी मजदुर युनियनमा संगठित भएपछि राईले थुप्रै व्यवसायीहरु र आफ्नै युनियनका पनि आफूसँग असहमत हुने सहकर्मीहरुको घाँटीको हड्डी फुट्नेगरी कुटपिट गरिसकेका छन्।

सर्वहारा वर्गको संगठनका नाममा लाखौं उठाएर हिनामिना गरे पनि र आफ्नै कामरेडहरुलाई रामधुलाई गरे पनि कतैबाट कारबाही नभएपछि हौसिएका राईले राकेश बाद्वालाई समेत शालिकराम जम्कट्टेलको आडभरोसामा अन्ना क्यासिनोमा प्रवेश गर्नै नदिएको कुरा सोही क्यासिनोका मजदुरले बताएका छन्। उनीहरुको भनाइमा जबदेखि जम्कट्टेल र कल्पदीपको टोलीले क्यासिनोमा बाद्वालाई पस्न दिएनन् त्यहीबेलादेखि नै सरकारी राजस्व पनि तिरिएको छैन।  

बाद्वालाई प्रवेश गर्न नदिएपछि अन्ना क्यासिनोका तत्कालीन महाप्रबन्धक रामकृष्ण चक्रधरलाई पनि नाम मात्रको बनाएर जम्कट्टेल र कल्पदीपको टोलीले सम्पूर्ण आम्दानी आफ्नै कब्जामा लिने गरेको त्यहाँ कार्यरत मजदूरले बताएका छन्। त्यसपछि वाद्वालाई राजश्व नतिरेको आरोपमा सरकारले पक्राउ पूर्जी जारी गरेपछि त उनीहरुको भागमा खुदो नै परिहाल्यो। अब उनीहरुले चक्रधरलाई समेत राजीनामा दिन बाध्य बनाएर नेपालमा ५ करोड रुपैयाँ भन्दा बढी ऋण लागेर तिर्न नसकेर भारत भास्सिएका तप्तबहादुर विष्टलाई ल्याएर अन्ना क्यासिनोको महाप्रबन्धक बनाए।

जुवाडेहरुलाई चर्को ब्याजमा पैसा दिने धन्दा चल्दै जाँदा उनले यस्तै चर्को ब्याजमा सापटी पनि दिन थाले। जुवाडेलाई लगानी गरेको पैसा फिर्ता नआएपछि आफूले लिएको ऋण पनि तिर्न नसक्ने अवस्थामा उनी देश नै छाडेर भारत गए। शुरुमा हैदरावादमा बसेका उनी त्यहाँ टिक्न नसकेपछि गोवा पुगे र क्यासिनोमै काम शुरु गरे। गोवामै रहेका बेला राईको समूहले विष्टलाई नेपाल ल्याएर महाप्रबन्धक बनाए। लिइएको ऋण तिर्न नसकेपछि एक ऋणीले विष्टमाथि सार्वजनिक रुपले नै निकै नराम्रो व्यवहार गरेका अझै पनि अन्ना क्यासिनोका मजदुरहरुले बिर्सिएका छैनन्।  

तप्तलाई महाप्रबन्धक बनाउँदा राईसमेत बसी मजदुरका सामु एक महिनाभित्र सबै बाँकी बक्यौता तिरिसक्ने र क्यासिनोलाई सञ्चालन गर्ने प्रतिबद्धता जनाइएको थियो। तर सो समय बितिसक्दा पनि कुनै पनि प्रतिबद्धता पूरा नभएपछि माओवादी मजदुरहरुले नै प्रतिबद्धता पूरा गर्न माग राखे। विष्ट र राईको टोलीले मजदुरको, ठेकेदारको, सप्लायर्सको र सरकारी राजस्व तिर्नुको सट्टा उल्टै प्रतिबद्धता पूरा गर्ने माग गर्ने मजदुरहरुलाई कुटपिट गर्न थाले। यसक्रममै राईले प्रहरीको समेत पाहुना बन्नुपर्यो। उनलाई एमाओवादी पार्टीको पदाधिकारीको बैठकले कारबाही पनि गर्योन।  

तर यता क्यासिनोमा भने बाद्वाकै पालामा स्टाफ ग्य्राजुटी फण्डका नाममा अवकाश प्राप्त गरेर जाँदा दिइने गरी दैनिक ५० हजारका दरले जम्मा गरिएको रकम २ करोड रुपैयाँ भएको थियो। राई र विष्टको अग्रसरतामा सो रकम निकालिएको छ। यतिमात्र नभएर मजदुर कल्याणकारी कोषका नाममा बाद्वाको पालादेखि नै जम्मा गरिएको ५० लाख रुपैयाँ पनि उनीहरुले निकालेर अपचलन गरेको आरोप छ। साँघुलाई प्राप्त विवरणमा भनिएको छ,–''उनीहरुले क्यासिनोका नाममा रहेका ३ वटा गाडी पनि १३ लाखमा बेचेर रकम आफ्नै गोजीमा हालेका छन्। अहिले त उनीहरु क्यासिनो नै आफूले किनेको दाबी गरी फर्जी मालिक पनि बनेका छन्।

क्यासिनोका नाममा जम्मा भएका करीब सबै रकम र गाडीसमेत बेचिसकेका यिनीहरुले मजदुरलाई भने दिइदै आएका सुविधा पनि कटाउँदै गएका छन्।'' हालसम्म क्यासिनोमा पाउँदै आएको खाजा वा खाना खाने सुविधा राई र विष्टले कटाएका बताइएको छ। गत दशैंदेखिकै ओभरटाइमको रकम नदिइएको, नोभेम्बर र डिसेम्बरको तलबभत्ता हालसम्म पनि नदिइएको, नियमित रुपले पाउँदै आएको इन्सेन्टिभ पनि नदिइएको बताइएको छ। यातायात भत्ता र औषधि उपचारको रकम पनि यिनीहरु आएपछि मजदुरले पाएका छैनन्।

पुराना मजदुरहरुले पाउनै पर्ने सुविधा नपाएका भए पनि राइ र विष्टले आफ्ना ६८ जनाको समूहलाई क्यासिनोमा जागिर खुवाएका छन्। बरु आफ्नो लुटको राज्य कायम राख्न उनीहरुले सम्भावित विरोध गर्नसक्ने मजदुरहरुलाई जागिरबाट नै बिस्तारै पाखा लगाउँदै गएका छन्। यसरी छोटो समयमै करोडका करोड हिनामिना गरी दुनियाँलाई मूर्ख बनाउन सक्ने राई र विष्टलाई रोलमोडल बनाएर तपाई पनि करोडपति बन्ने हो कि?