Weekly Nepal

राष्ट्रपति भागाभाग!

राष्ट्रपति डा. रामवरण यादव अस्ति बेलुकी एकजना विदेशी पाहुना अर्थात् भारतीय जनता पार्टीका नेता विजय जोलीसँग नेपालको राजनीतिका बारेमा गम्भीर कुराकानी गर्दै थिए। 
अचानक राष्ट्रपति हल्लन थाले। ती विदेशी पाहुना पनि राष्ट्रपति यादव हल्लिएको देखेर तीन छक्क परे। एकै क्षणमा राष्ट्रपति कुराकानी गर्न छाडेर भूईंचालो भन्दै दौडिए। ती पाहुना राष्ट्रपति बौलाएका पो हुन् कि भनेर अचम्ममा परे। पछि धेरै हल्लाउन थालेपछि ती पाहुना पनि राष्ट्रपतिको पछिपछि भर्‍याङबाट ओर्लिएर शीतल निवासको आँगनमा पुगे। आँगनमा राष्ट्रपति कालोनीलो भा'को देखेर ती विदेशी पाहुना मनमनै भन्दै थिए – यति सानो भूकम्पको धक्काबाट भाग्ने राष्ट्रपतिले संकटकाल कसरी थाम्लान्?

महरा भुतुक्कै!
भाजपाका विजय जोली हिजो बिहान प्रचण्डको नाडी छाम्न नयाँबजार पुगे। जोली आउने था' पाएर प्रचण्डले विदेश विभाग प्रमुख कृष्णबहादुर महरालाई पनि नयाँ बजारमा डाके। 
जोलीले प्रचण्डलाई सीधा प्रश्न गरे – तपाईंलाई नम्बर एक भारत विरोधी भनिन्छ। नम्बर दुई हिन्दू धर्म विरोधी? साँचो कुरा के हो? जोलीको कुरा सुनेर अचम्म मान्दै प्रचण्डले भने दुबै गलत। न म भारत विरोधी थिएँ, न छु, न हुनेछु। न त हिन्दू धर्मको विरोधी नै। एउटा सामान्य भाजपाका नेताका अगाडि प्रचण्डजस्तो क्रान्तिकारी नेता लत्रेको देखेर महरा लाजले भुतुक्कै भए।
माननीय सदस्यहरू!
संविधानसभाको बैठकमा सभामुख सुवास नेम्वाङले पटक पटक माननीय सदस्यहरू भन्दा पनि माननीयहरू खुट्टा कमाउँदै भागभाग गरे। तर, नेम्वाङ डगमगाएनन्। पछि प्रचण्डले भुईंचालो भूईंचालो भनेर कराएपछि सबैको भागदौड भयो। बैठक सभामुखले १५ मिनेटको लागि स्थगित गरे। 
लामो स्वाद फेर्दै बाहिर आएका प्रचण्डलाई रामचन्द्र पौडेलले भने – क्रान्ति गर्छु भन्ने मान्छे नाथे भुईंचालोबाट किन डराएको? पौडेलको कुरो सुनेर बाबुराम भट्टराईले जिब्रो टोके। 

क्याबिनेटमै ......?
गृहमन्त्री विजय गच्छेदारले गृहसचिव लीलामणि पौडेललाई हटाउन क्याबिनेट बैठकमै ठाडो प्रस्ताव ल्याएपछि माओवादी र मधेशवादी मन्त्रीबीच भनाभन भयो। 
डा. बाबुराम भट्टराईको प्रतिबद्धता विरुद्ध आएको गच्छेदारको प्रस्ताव तुहाउन टोपबहादुर रायमाझीले के मात्र बोल्न खोजेका थिए, गच्छेदारले भने – प्रधानमन्त्रीज्यू, होस् गर्नुस्। तपाईंलाई प्रधानमन्त्रीको कुर्ची प्यारो कि गृहसचिवको? त्यसपछि बिचरा बाबुराम पनि लुत्रुकै परेको देखेर मुख्य सचिव माधव घिमिरे छाँगोबाट खसे।

एसडी मुनीको मन्त्र 
डा. बाबुराम भट्टराईका गुरु भनेर चिनिने एसडी मुनी आफ्ना पाहुनालाई बधाई दिन अस्ति बालुवाटार छिरे। एसडी मुनि बालुवाटार छिरेपछि बालुवाटार पनि पवित्र भयो। 
मुनी र भट्टराईबीच अस्ति बिहान नेपालको राजनीतिका बारेमा गम्भीर वार्ता भयो। मुनीले भने – वैद्य, बादल ज–जसले शान्ति प्रक्रियाको विरोध गरे पनि तपार्इंले चाहिँ भारतको विरोध नगर्नु होला। त्यसपछि भट्टराईले दंग पर्दै  'भारतको विरोध गर्नु ट्याकटिस न हो' भनेपछि दुवैले अंकमाल गरेको दृश्य देखेर देवेन्द्र पौडेल टाप कसे। 

सुजाताको टेन्सन 
ज्वाइँ रुवेल चौधरी भागेदेखि टेन्सनमा रहेकी सुजाता कोइराला दिनदिनै मुर्मुरिन थालेकी छिन्। मुखमा जे आयो त्यही प्वाक्क बोल्ने बानी परेकी सुजाताले अस्ति विराटनगर पुगेर डा. बाबुरामको समर्थन गरिन्। सुजाताको कुरो सुनेर पत्रकारहरूले कानेखुसी गर्दै यो बौलाही कहिले राजाको समर्थन गर्छिन्, कहिले माओवादीको? पत्रकारको कुरो ठीकै होला कि कसो ऋषि धमलाज्यू?