Weekly Nepal

शान्तिप्रकृया ठप्प

Details

Category: विविध

विजया दशमीको छुट्टीको अवसरलाई सदुपयोग गर्ने भन्दै प्रधानमन्त्री डा. बाबुराम भट्टराईले अभिव्यक्ति दिए पनि त्यो हावादारीमा परिणत हुन पुगेको छ। शान्ति प्रक्रियालाई ४५ दिन भित्र निष्कर्षमा पुर्‍याउने प्रतिबद्धतासहित भट्टराई प्रधानमन्त्रीमा निर्वाचित हुनु भएपनि त्यो प्रकृया अघि बढ्न सकेको छैन। शान्ति प्रकृया अघि नबढेसम्म मुलुकले विकास पाउन सक्दैन। शान्ति प्रक्रिया टुगोमा पुर्‍याउन माओवादी पीडितका तर्फबाट प्रधानमन्त्रीलाई ज्ञापनपत्रमार्फत् माओवादीद्वारा नियन्त्रणमा लिइएका घरजग्गा तथा सम्पत्तिको विवरण बुझाउने कार्य पनि भैसकेको छ। त्यसैले शान्ति प्रक्रियाका विषयमा प्रधानमन्त्री भट्टराई संवेदनशील भई शान्ति प्रक्रियालाई जारी राख्नु उचित हुन्छ। अहिलेको हिसाबमा शान्तिप्रक्रिया ठप्प पारियो भने प्रधानमन्त्री भट्टराई पनि बेकामेमा परिणत हुनुहुनेछ।
– अशोक ढोडारी
काभ्रेपलाञ्चोक

प्रचण्डको बुद्धि आओस्
 
एकीकृत नेकपा (माओवादी) का अध्यक्ष पुष्पकमल दाहाल (प्रचण्ड) का पिता मुक्तिनाथ दाहालको निधन हालै भएको सुनेर दुःख लाग्यो। प्रचण्डका पिता विभिन्न रोगका कारण केही समयदेखि थलिदै आएको समाचारहरु पनि पढेको थिएँ। 'नयाँ विमर्श' ले केही महिना अघि उहाँको स्वास्थ्य स्थिति बिग्रिएको तथा छोरा प्रचण्डले उहाँको अवस्थाप्रति खासै चासो नराखेको समाचार पनि आएको थियो। अझ नरमाइलो पक्ष प्रचण्डले आफ्नो बृद्ध पितालाई साथमा नराख्दा उहाँ आफ्ना भतिजाको घरमा बस्न विवश रहेको पनि जानकारीमा आएको हो। धार्मिक प्रवृत्तिका मुक्तिनाथ दाहालको निधन हुँदा हाम्रो धार्मिक संस्कारसहित प्रचण्डले आफ्ना पिताको दाहसंस्कार गरी क्रियामा बस्ने अपेक्षा गरिएको थियो। त्यसविपरित दागबत्ती दिने बाहेक कुनै कर्म नगरी प्रचण्डले अधर्म गर्नुभएको छ। आफूलाई खरो कम्युनिष्ट देखाउन उहाँले त्यसो गर्नुभएको होला तर कम्युनिस्टका जननी मानिने मुलुक रुस र चीनमा समेत धर्म मान्ने गरिएको छ। मानिसको मृत्युपछि उसको संस्कार त्यो पनि विधिवत् रुपमा गरिएमा मात्र सत्गति प्राप्त हुने बताइन्छ। यस्तो अवस्थामा प्रचण्डबाट गल्ती भएको छ, उहाँको बुद्धि आओस्, यही कामना।
– त्रिलोक दाहाल
देवघाट, चितवन