Weekly Nepal

'अर्गानिक मह उत्पादन गर्नुहोस्'

चितवन, फागुन ७ । नेपाली कांग्रेसका उपसभापति रामचन्द्र पौडेलले अर्गानिक मह उत्पादनमा जोड दिन मौरीपालक किसानलाई आग्रह गरेका छन्। 
 
भरतपुरमा शनिबारदेखि सुरु भएको नेपाल मौरीपालक महासङ्घको १३ औँ राष्ट्रिय सम्मेलन उद्घाटन कार्यक्रमा उनले नयाँ कार्ययोजना बनाएर ल्याए आफूले मह र मौरीपालन क्षेत्रमा सहयोग गर्ने आश्वासन समेत दिएका थिए।
 
कृषि विकासका लागि प्रभावकारी काम हुन नसकेको औँल्याउँदै उपसभापति पौडेलले भएका नीति र योजनामा पनि सरकार गम्भीर नबनेको दाबी गरे।योजना आउने र हराउने गरेकाले कृषिक्षेत्रमा राम्रो विकास हुन नसकेको उनको भनाइ थियो।
 
सम्मेलनमा ३२ जिल्लाका १५० भन्दा बढी मौरीपालक किसान सहभागी भएका छन्।

सानिमा अब वाणिज्य बैंक

राष्ट्र बैंकले सानिमा विकास बैंकलाई स्तरोन्नति गरी वाणिज्य बैकिङ कारोबार गर्न स्वीकृति दिएको छ। राष्ट्र बैंक संचालक समितिको बिहिबार बसेको बैठकले उक्त निर्णय गरेको हो।  

सानिमाले राष्ट्र बैंकबाट स्तरोन्नतिको पत्र पाएलगत्तै बैकिङ कारोबार थाल्ने जनाएको छ। हामी आगामी सातादेखि नै वाणिज्य बैंकको कारोबार सुरु गर्न तयार छौ, सानिमाका प्रमुख कार्यकारी अधिकारी कुमार लम्सालले भने, संस्थागत, सुशासन पूर्ण पालना भएकाले राष्ट्र बैंकले स्वीकृति दिएको हुनुपर्छ। हामी अब ग्राहकलाई अझ पुरस्कृत र आधुनिक बैंकिङ सुविधा दिनेछौ।  

सानिमा बैंकले चुक्ता पुँजी २ अर्ब १ करोड छ। बैंकमा गैरआवासिय नेपाली लगायत सर्वसाधारणको लगानी छ। यो निर्णयपछि अब छिट्टै सानिमाको सेयर कारोबार यथागत हुने भएको छ। विकास बैंकबाट स्तरोन्नति हुने क्रममा विगत केही महिनादेखि यो बैंकको सेयर कारोबार रोकिएको थियो। 

सिमेन्ट उद्योग धरासायी बन्दै

विराटनगर, फागुन ७ । लोडसेडिङका कारण पूर्वाञ्चलका सिमेन्ट उद्योगहरू कम उत्पादन गर्न बाध्य भएका छन्। पूर्वाञ्चलमा बढ्दो सिमेन्ट उद्योग तथा उत्पादनले भारतीय सिमेन्ट विस्थापित भइरहेका बेला लोडसेडिङले गर्दा नेपाली सिमेन्ट तथा उत्पादनलाई नेपाली सिमेन्ट उत्पादनमा प्रतिस्पर्धा गर्न समस्या परेको हो।
 
 
दैनिक एक हजार ५०० बोरा सिमेन्ट उत्पादन गर्ने झापाको मन्सा सिमेन्ट उद्योगका सञ्चालक परशुराम अग्रवाल लोडसेडिङ र कच्चापदार्थको अत्यधिक ढुवानी भाडाले आफूहरूलाई ठूलो समस्या परेको गुनासो गर्छन्। उनका अनुसार लोडसेडिङका कारण प्रतिबोरा सिमेन्ट उत्पादनमा थप रु ४०  लाग्ने गरेको छ भने डिजल नपाउँदा झन् समस्या थपिएको छ।  विद्युतबाट प्रतियुनिट रु पाँच खर्च हुने स्थानमा डिजलबाट प्रतियुनिट रु ४५ खर्च हुनेगरेको अग्रवालको भनाइ छ।
 
पूर्वाञ्चलमा उदयपुरको गैँडा सिमेन्ट, मारुती सिमेन्ट, सेन्चुरी, मन्सा, मित्तलको पशुपति र नेशनलको भव्या सिमेन्ट उद्योग सञ्चालनमा छन्। पूर्वाञ्चलमा रहेका सातवटा सिमेन्ट उद्योगले दैनिक दुई हजार बोरा सिमेन्ट उत्पादन गर्ने गरेका छन्।
 

बेमौसममा लालीगुराँस फुलेपछि पर्यटन व्यवसायी चिन्तित

ताप्लेजुङ, फागुन १ । साधारण तथा चैत–वैशाखमा फुल्ने लालीगुँरास ताप्लेजुङका पर्यटकीय क्षेत्रमा यो वर्ष माघ अन्तिममा नै ढकमक्क फुलेपछि पर्यटक व्यवसायी भने चिन्तित भएका छन्।
 
जिल्लाको पाथिभरा क्षेत्रलगायत पर्यटकीयस्थल कञ्चनजङ्घा संरक्षण क्षेत्रमा बेमौसममा नै यसरी लालीगुराँस फुलेपछि र पर्यटक आउने मौसममा गुराँस सकिने र सुक्ने डरले पर्यटक व्यवसायी चिन्तित भएका हुन्। 
 
दुई महिनाअघि नै फाट्टफुट्ट फुलेको गुराँस माघ सकिँदै पूरै फुलेको छ।  चैत–वैशाखमा लालीगुराँस हेर्न र योसँग रमाउन धेरै आन्तरिक र बाह्य पर्यटक आउने गरेको तर यो साल दुई महिनाअघि नै फुलेको र पछि सकिने पो हो कि भन्ने डर स्थानीय तथा व्यवसायीलाई भएको छ।  
 
वन क्षेत्रमा क्रियाशील सङ्घसंस्था भने जलवायु परिवर्तनको कारण गुराँस साबिकभन्दा अघि नै फुलेको दाबी गर्दछन्। जिल्लाका अधिकांश जङ्गल लालीगुराँसले मनमोहक बनेका छन्।