Weekly Nepal

थारुलाई भारु.को बात्!

काठमाडौं, साउन ३० । करिब ९ महिना पहिला निर्वाचित थारु कल्याणकारी सभाका अध्यक्षको पद धरापमा परेको छ। देशभरका थारुहरूको साझा संगठनका रुपमा मानिएको थारु कल्याणकारी सभाका नवनिर्वाचित अध्यक्ष चन्द्रबहादुर थारुको कामकारबाही र गतिविधि शंकास्पद भएको भन्दै अधिकांश सदस्यहरू असन्तुष्ट बनेका छन्। अदृश्य शक्ति र समूहसँगको निरन्तर उठबस र व्यवहारले उनलाई अपदस्थ गर्नुपर्ने तर्क पनि केही सदस्यले गर्न थालेका छन्। सभानिकट स्रोतका अनुसार लक्ष्मण थारुको पक्षबाट केन्द्रीय सदस्यमा निर्वाचित ३ जनाबाहेक सबै पदाधिकारी र सदस्यहरू अध्यक्षको व्यवहारबाट असन्तुष्ट छन्।

त्यसो त केही केन्द्रीय सदस्यले केन्द्रीय समितिको बैठकमा पैसा खाएर कार्यसमितिलाई जानकारी नै नदिई के के काम भएका छन् भन्दै हिसाबकिताब पनि मागेका थिए। तराईलाई मधेश भनेको भन्दै थारु समुदायले मधेशीको आलोचना गर्दै आएका बेला मधेशी मोर्चासँग सभाको नामबाट सहमति गर्नु नै अध्यक्षका लागि पद धरापमा पर्ने कारण बनेको हो। अध्यक्ष चन्द्रबहादुरले मधेशी मोर्चासँग सहमति गरेपछि अध्यक्षविरुद्ध गठजोड सुरु भएको छ। मधेशी दलहरूको मोर्चासँग राजनीतिक मुद्दादेखि सबै प्रकारको आन्दोलनमा सहकार्य गरेर जाने सहमति असार २९ गते थारु कल्याणकारी सभाका अध्यक्ष चन्द्रबहादुर थारुले हस्ताक्षर गरेका थिए। सो हस्ताक्षरपछि सभाभित्र विवाद चर्किएको थियो। अध्यक्षले पैसा खाएर मधेशी मोर्चासँग सहमति गरेको आरोप पनि लागेको छ। केन्द्रीय सदस्यहरूले नै यस्तो आरोप लगाएका हुन्।  

असार २९ गते सहमतिमा हस्ताक्षर गरेलगत्तै साउन ४ गते कार्यदल गठन गरियो। त्यसपछि झन् चर्किएको विवाद मिलाउन साउन २१ गते केन्द्रीय कार्यसमितिको बैठक बसेको थियो। मधेशी दलबाट कति पैसा खाएर सहमति गरेको? भन्दै केन्द्रीय सदस्यले अध्यक्ष चन्द्रबहादरसँग हिसाब किताब मागेका थिए। थारु कल्याणकारी सभालाई नियोजित रुपमा भारतीय योजनाअनुसार चलाउन खोजेको र पैसामा बिकेको आरोप सदस्यले लगाए पनि अध्यक्षले भने कुनै जवाफ नफर्काएको एक सदस्यले जानकारी दिए। ती सदस्यका अनुसार एमालेको कोटाबाट सभाको अध्यक्षमा निर्वाचित भएका चन्द्रबहादुरले आफु नजिकका सदस्यहरूलाई समेत सहमति गर्नेबारेमा सोधेका थिएनन्।

करिब ९ महिना अगाडि चन्द्रबहादुरको नेतृत्वमा नयाँ कार्यसमिति आएको हो। यही कार्यसमितिमा लक्ष्मण थारु समर्थक केही सदस्यले भने मधेशी मोर्चासँग भएको सहमतिमा मौन बसेको पनि एक केन्द्रीय समिति सदस्यले बताएका छन्। उनका अनुसार विगतका बैठकमा अध्यक्षविरुद्ध खनिने उनीहरू अहिले भने मौन बसेका थिए। साउन २१ गतेको बैठकमा आफूलाई मधेशी मोर्चाले फसाएको भन्दै आत्मालोचना गरेपछि तत्कालका लागि उनी जोगिएका छन्।